30. Philosophus in Nave II

---

---

At ubi caelum enituit
et
ardor ille tempestatis deflagravit,
accedit ad Stoicum
Graecus quispiam dives ex Asia,
homo lautissimus.
Is quasi illudens,
"Quid hoc est," inquit,
"O philosophe,
quod,
cum in periculis essemus,
timuisti tu et palluisti,
ego neque timui neque pallui?"
Et philosophus
aliquantum cunctatus,
an respondere ei conveniret,
"Si quid ego," inquit,
"in tanta violentia tempestatum
videor paulum pavefactus,
non tu
istius rei ratione audienda
dignus es.
Sed tibi sane
Aristippus ille
pro me responderit,
qui in simili tempore
a simillimo tui homine interrogatus,
quare philosophus timeret,
cum ille contra nihil metueret,
respondit,
quoniam
is esset non magnopere sollicitus
pro anima nequissimi nebulonis,
ipse autem
pro Aristippi anima timeret."

(image)

---

TEXT SOURCE: Excerpta Facilia, a Second Latin Translation Book , by H.R Heatley and H.N. Kingdon (1883). Vocabulary List in back of book.

---

29. Philosophus in Nave I

---

---

Navigabamus olim mare Ionium,
violentum et vastum.
Nocte,
quae
diem primum secuta est,
ventus
a latere saeviens
navem undis compleverat.
Dies quidem tandem illuxit,
sed nihil de periculo remissum:
quin turbines
etiam crebriores
navem depressuri videbantur.
In eadem nave
fuit philosophus
in disciplina Stoica celebratus,
quem
ego Athenis cognoveram,
non parva virum auctoritate.
Eum tunc
in tantis periculis
inque illo tumultu caeli marisque
requirebam oculis,
scire cupiens,
quonam statu animi,
et an interritus intrepidusque esset.
Atque ibi hominem conspicimus,
impavidum,
ploratus quidem nullos,
sicuti ceteri omnes,
nec ullas eiusmodi voces cientem,
sed coloris et vultus turbatione
non multum a ceteris differentem.

(image)

---

TEXT SOURCE: Excerpta Facilia, a Second Latin Translation Book , by H.R Heatley and H.N. Kingdon (1883). Vocabulary List in back of book.

---

1. Aristippus

---

          

---

Aristíppum philósophum
rogávit quidam,
ut fílium suum erudíret.
Cum vero ille,
pro mercéde,
petiísset quingéntas drachmas,
pater,
detérritus prétio
quod
aváro et rudi hómini
nímium videbátur,
dixit,
"Tanto prétio
émere possum mancípium."
Tum philósophus,
"Eme," inquit,
"et habébis duo."

(image)

---

TEXT SOURCE: First Easy Latin Reading Book - Anecdotes, by Edmund Fowle (1877). Vocabulary Lists in back of book.

---