24. Hannibal Imperator Factus

---

---

Hánnibal iúvenis
cum patre Hamílcare
in Hispániam proféctus est.
Hamílcaris post óbitum,
Hasdrúbale fratre
creáto imperatóre,
Hánnibal
omni equitátui praéfuit.
Hasdrúbale interfécto,
exércitus impérium
ad Hanníbalem
univérso ómnium consénsu
détulit.
Sic Hánnibal,
quinque et vigínti annos
natus,
imperátor factus
suffrágio mílitum,
próximo triénnio
omnes gentes Hispániae
bello subégit:
Sagúntum,
foederátam cum Románis
civitátem,
vi expugnávit:
tres exércitus máximos
comparávit.

(image: Roman theater at Saguntum)

---

TEXT SOURCE: Selections from Latin Authors for Sight-Reading, by Everett Titsworth Tomlinson (1886). This book does not have a vocabulary list in the back.

---

35. Hannibalis Iusiurandum

---

---

Hánnibal ille
cum multa
de fide sua
et ódio in Romános
apud regem Antíochum
commemorásset,
hoc adiúnxit:
"Pater meus," inquit, "Hamílcar,
me púero
non ámplius novem annos nato,
in Hispániam
imperátor proficíscens,
Carthágine
Iovi óptimo máximo
hóstias immolávit.
Quae divína res
dum conficiebátur,
quaesívit a me
vellémne
secum in castra proficísci;
id cum libénter accepíssem,
tum ille
"Fáciam," inquit,
"si mihi fidem,
quam póstulo,
déderis."
Simul
me ad aram addúxit,
apud quam sacrificáre institúerat,
eámque céteris remótis tenéntem
iuráre iussit
nunquam me
in amicítia cum Románis fore.
Id ego iusiurándum patri datum
usque ad hanc aetátem
ita conservávi,
ut némini dúbium esse débeat,
quin
reliquo témpore
eádem mente sim futúrus.

(image)

---

TEXT SOURCE: Excerpta Facilia, a Second Latin Translation Book , by H.R Heatley and H.N. Kingdon (1883). Vocabulary List in back of book.

---