50. Leo et Socii

---

---

Vacca et capélla et ovis
cum leóne
in agro sócii fuérunt.
Cervus ingens captus est
et leo
praedam his verbis divísit.
"Ego
primam partem tollo,
quóniam nóminor leo;
secúndam mihi dábitis,
quia sum fortis;
tértia est mihi,
quia plus váleo;
si quis quartam tanget,
mihi poenas dabit."

---

Click here for a SLIDESHOW of all the colored Steinhowel Aesop images. Notice the very red blood!

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

48. Canis Carnem Ferens

---

---

Canis,
per flumen natans,
carnem in ore ferébat.
Mox
in aqua
simulácrum suum
et álteram carnem
vidit.
Hanc praedam
ab áltero cane
erípere vóluit.
Ítaque cibum,
quem tenébat,
ore dimísit.
Neque cibum,
quem petébat,
attíngere pótuit.
Is enim
mérito suum amíttit,
qui aliénum petit.

---

Click here for a SLIDESHOW of all the Crane Aesop images.

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

47. Ursus et Vulpes II

---

---

"Quo diútius manébis,
eo plures pisces cápies.
Dénique
caudam tuam
quam celérrime extráhere debes."
Ítaque ursus
id, quod vulpes praecéperat,
fácere conátus est.
Ad gláciem proféctus,
cavum ibi fecit.
Tum caudam
per cavum
in aquam demísit.
Post multas horas
caudam
summis víribus
extráhere conátus est.
Frigus autem
máximum erat
et cauda
iam glácie reténta est.
Ítaque
súbito motu cauda rupta est.
Hanc ob causam
ursus adhuc
parvam modo caudam habet.

(image)

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

46. Ursus et Vulpes I

---

---

Ursus quondam
vulpi óbviam venit,
quae
nonnúllos pisces
in ore suo portábat.
"Unde hos tulísti?"
rogávit ursus.
"Dómine mi,"
respóndit vulpes,
"ego
iam multas horas piscor
et hos cepi."
Deinde ursus étiam
piscári díscere vóluit
et vulpem rogávit
quómodo
hoc fácere posset.
"Age vero,"
inquit vulpes,
"illud
haudquáquam diffícile est factu.
Necésse est
ad gláciem ire
et ibi cavum fódere,
ubi caudam tuam
in aquam demíttas.
Necésse est
ibi manére
quámdiu póteris.
Ne caudam tuam móveris,
si quid dolóris sénseris.
Tum enim
pisces mordére coepérunt.

(image)

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

45. Leo et Asinus et Vulpes

---

---

Leo et ásinus et vulpes
in silva venabántur.
Magnam praedam cápiunt.
Tum cenam fácere volunt.
Ásinus autem
praedam dívidit.
Primo
sibi magnam partem capit.
Statim leo,
irátus,
ásinum dilániat.
Tum vulpes
praedam dívidit.
Ille autem
fere ómnia leóni dat.
Mínimam partem sibi servat.
Tum leo inquit:
"Amíce,
aequam partitiónem fecísti."
"Eheu," vulpes respóndet,
"ex fato ásini
sápiens esse disco."

---

Click here for a SLIDESHOW of all the Osius Aesop images.

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

44. Asinus in Leonis Pelle

---

---

Ásinus
leónis pelle indútus
per campos currébat.
Hoc spectáculum
béstias turbat et hómines terret:
mulíeres et púeri fúgiunt;
pavóre percúlsi,
agrícolae discédunt.
At súbito
auris ingens,
quae diu latúerat,
appáret
et fraudem osténdit,
falsum leónem denúntians.
Tum omnes rústici rident
et, fústibus armáti,
in ásinum ruunt.
Brevi témpore
eum pelle spóliant
et in stábulum redúcunt.

---

Click here for a SLIDESHOW of all the Crane Aesop images.

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

35. Canis Fidus

---

---

Rex olim
in móntibus venabátur.
Dum autem abest,
canem
praesídio infánti fílio relínquit.
Mox domum redit.
Infántem autem
reperíre non potest.
Tum
guttas sánguinis humi videt.
Statim canem culpat.
"Pérfide custos," inquit,
"voravísti fílium meum."
Sine mora
canem gládio transfígit.
Nec multo post
infántis vocem audit.
Fílium suum,
vivum et íntegrum, réperit.
Haud procul
lupi corpus videt,
quem
canis occíderat.
Ítaque canem
magna cum cura sépelit.
In sepúlcro
magnum lápidem ponit.
Dóminus póstea
per totam vitam
fidum canem lugébat.

(image)

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

10. Agricola et Filii Eius II

---

---

Primo
fílii maesti
patrem sepelivérunt.
Deinde
thesaúrum in vínea quaerunt.
Totum ígitur solum víneae
fódiunt.
Frustra tamen
hunc labórem fáciunt.
Nullum enim thesaúrum
invéniunt.
Sed intérea
terram bene colunt.
Próximo anno
vites
multas uvas ferunt.
Hinc fílii
multum pecúniae cápiunt.
Deinde fílii
verba patris intéllegunt.
Nihil enim
sine labóre
mortálibus datur.

(image)

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

9. Agricola et Filii Eius I

---

---

Agrícola quondam
in lecto suo iacébat.
Diu
aeger fuerat
et iam prope mortem erat.
Tum
fílios ad lectum suum vocat.
Hos
multis cum lácrimis
pater allóquitur.
Nullas enim divítias
fíliis relínquere pótuit.
"Fílii mei," inquit,
"a vobis mox discédam.
Omnes divítias meas
in vínea relínquo.
Quaérite eas
magna cum cura."
Haec verba
senex
fíliis suis dixit.
Non multo post
agrícola mórtuus est.

(image)

---

TEXT SOURCE: Scalae Primae: A First Latin Reader, by J. G. Spencer (1908), with a vocabulary list in the back.

---

15. Societas Leonina

---

---

Societátem iúnxerant
leo, iuvénca, capra, ovis.
Praeda autem
quam céperant
in quáttuor partes aequáles
divísa,
leo,
"Prima," ait, "mea est;
debétur enim haec
praestántiae meae.
Tollam et secúndam,
quam merétur robur meum.
Tértiam víndicat sibi
egrégius labor meus.
Quartam
qui sibi arrogáre volúerit,
is sciat,
se habitúrum
me inimícum sibi."
Quid fácerent imbecílles béstiae,
aut
quae
sibi leónem inféstum habére
vellet?

(image)

---

TEXT SOURCE: Selections from Latin Authors for Sight-Reading, by Everett Titsworth Tomlinson (1886). This book does not have a vocabulary list in the back.

---

11. Agricola et Filii Eius

---

---

Agrícola senex,
cum
mortem sibi appropinquáre
sentíret,
fílios convocávit,
quos,
ut fíeri solet,
intérdum discordáre
nóverat,
et
fascem virgulárum afférri
iubet.
Quibus allátis,
fílios hortátur,
ut hunc fascem frángerent.
Quod
cum fácere non possent,
distríbuit síngulas virgas,
iísque celériter fractis,
dócuit illos,
quam firma res esset
concórdia,
quamque imbecíllis
discórdia.

(image)

---

TEXT SOURCE: Selections from Latin Authors for Sight-Reading, by Everett Titsworth Tomlinson (1886). This book does not have a vocabulary list in the back.

---

6. Ova Aurea

---

---

Múlier quaedam
habébat gallínam,
quae
ei quotídie
ovum pariébat aúreum.
Hinc
suspicári coepit,
illam
auri massam celáre,
et gallínam occídit.
Sed nihil in ea réperit,
nisi quod
in áliis gallínis reperíri solet.
Ítaque
dum maióribus divítiis inhiábat,
étiam minóres pérdidit.

(image)

---

TEXT SOURCE: Selections from Latin Authors for Sight-Reading, by Everett Titsworth Tomlinson (1886). This book does not have a vocabulary list in the back.

---

9. Cassita II

---

---

Die ígitur póstero
mater
in pábulum volat.
Dóminus
quos rogáverat
oppéritur.
Sol fervet
et fit nihil,
et amíci nulli erant.
Tum ille rursus ad fílium:
"Amíci isti," inquit,
"cessatóres sunt.
Quin pótius
cognátos affinésque nostros
orámus
ut adsint cras
ad meténdum?"
Ítidem hoc
pulli pavefácti
matri núntiant.
Mater hortátur
ut tum quoque
sine metu sint.
"Vos modo," inquit
"advértite,
si quid dénuo dicétur."
Alia luce orta,
avis
in pastum profécta est.
Cognáti et affínes
óperam,
quam rogáti sunt,
supérsedent.
Ad postrémum ígitur
dóminus fílio:
"Váleant," inquit,
"amíci cum propínquis.
Áfferes
prima luce
falces duas;
unam égomet mihi,
et tu tibi cápies áteram;
et fruméntum
nosmet ipsi
mánibus nostris
cras metémus."
Id
ubi ex pullis
dixísse dóminum
mater audívit:
"Tempus," inquit,
"est cedéndi et abeúndi."
Atque ita cassíta
migrávit
et seges
a dómino deméssa est.

(image)

---

TEXT SOURCE: Excerpta Facilia, a Second Latin Translation Book , by H.R Heatley and H.N. Kingdon (1883). Vocabulary List in back of book.

---