Non in facta modo
sed in voces étiam
petulantióres
públice Romae vindicátum est.
Áppii namque illíus Caeci fília,
a ludis quos spectáverat éxiens,
turba úndique confluéntis pópuli
iactáta est,
atque inde egréssa,
cum se male hábitam díceret,
"Quid me nunc factum esset,"
inquit,
"quantóque
ártius conflictáta essem,
si Públius Claúdius frater meus,
naváli proélio
classem návium
cum ingénti cívium número
non perdidísset.
Certe quidem,
maióre nunc cópia pópuli oppréssa,
intercidíssem.
Sed útinam revivíscat frater,
aliámque classem
in Sicíliam ducat
atque istam multitúdinem perdat,
quae
me male nunc míseram
convexávit."
Ob haec mulíeris verba
tam ímproba
tamque incivília
aedíles
multam dixérunt ei
aeris gravis vigínti quinque mília.
(image)
TEXT SOURCE: Excerpta Facilia, a Second Latin Translation Book , by H.R Heatley and H.N. Kingdon (1883). Vocabulary List in back of book.
No comments:
Post a Comment